Hilketa salatu du Emakundek, eta dei egin du gisa horretako erasoen aurka agertzera

Amaia Azkueren senideei eta hurkoei elkartasuna agertu die Emakundek. Epaiketa atzo amaituko zelakoan, ohar bat zabaldu zuen; hartan, hilketa gaitzetsi du, eta herritarrei eskatu die agertzeko hilketaren aurka. Kasua emakumeen aurkako indarkeriarekin lotu du Emakundek, esanez hori dela gizonen eta andreen arteko desberdintasunaren «adierazgarri latz eta gogorrena». Gogorarazi du guztien egitekoa dela horrelako erasoen aurka egitea.

Azpeitiko Udalak ostiralean herrian izandako erasoa salatu du. Azkueren epaiketan lekuko egindako pertsona bati eraso zioten. Motozale batek iraindu eta makila batekin jo zuela salatu zuen andreak; erietxeratu egin zuten. Azpeitiko alkate Eneko Etxeberriak esan du «oso larria eta onartezina» dela erasoa; zer gertatu zen argitzeko eta berriro gerta ez dadin neurriak hartzeko eskatu du.