Frantziako Poliziak 2009ko uztailean atxilotu zituen, Pauen, Itziar Plaza, Iurgi Garitagoitia eta Asier Borrero, ETAko kide izatea egotzita. Bost urte preso egon ondoren, gaur hasiko da haien aurkako epaiketa Parisen. Guztira, hogei kargutik gora aurkeztu dituzte hiru euskal presoen aurka. Besteak beste, ETAren zuloak kudeatzea.
Atxilotu aurreko hilabetean bi jendarme hiltzen saiatzea ere egozten diete, Poliziari ihes egiteko.
Lerin eta Imaz, Madrilen
Atzo, berriz, Iñaki Lerin eta Iñaki Imaz euskal presoen aurkako epaiketa hasi zen Espainiako Auzitegi Nazionalean. 2012az geroztik daude preso; Imaz Baionan atxilotu zuten, eta Lerin Londresen. ETAko Urederra taldeko kide izatea leporatuta, zortzi urteko espetxe zigorra eskatzen du fiskalak.
