Nafarroako Justizia Auzitegian egin dituzte Iruñeko sanferminetan gertatutako hiru sexu erasoren inguruko epaiketak. Aurrenekoarentzat urtebeteko zigorra eskatu du fiskalak, baina akusatuak ukatu egin du Gazteluko plazako taberna batean emakume bati "ipurmasaila, aldakak eta bizkarra" ukitu izana. Biktimak ezin izan zuen erasotzailea identifikatu, baina lekuko bat "guztiz ziur" azaldu da akusatua izan zela erasotzailea.
Bigarren akusatuarentzat bi urteko zigorra eskatu du fiskalak, eta hark ere ukatu du erasorik egin izana. Inputatuak esan du biktima, emakumezkoa, "agian pertsonaz okertu" dela, baina andrea ziur azaldu da inputatua zela erasotzailea.
Hirugarren gizonezkoa ados jarri da akusazioarekin, eta fiskalak erretiratu egin du sexu abusuen akusazioa. Lesio delitu bat egotzi diote. Gizonak onartu egin du biktimari 500 euroko kalte-ordaina ematea eta 360 euroko isuna ordaintzea.
