Aurreko aldietan izandako liskarrak saiheste aldera, goizean goiz joan dira Ertzaintza eta Udaltzaingoa Gasteizko Zabalgana auzoko Iruña Veleia kalera, etxegabetzea egitekoa zuten etxearen ataria inguratzeko asmoz.
Berriz ere kaleratze bat Gasteizen, emakume bat eta 2 ume. Oraingoan poliziak babesgunea jarrita dauka@StopArabapic.twitter.com/vkUwUNjUyU
— Kike Fdz de Pinedo (@KikeFdzdePinedo) 2016(e)ko urriak 3
Kaleratzeak Stop taldeak deituta, Ertzaintzak jarritako zintaren inguruan bildu da jendea. Alferrik izan da, ordea, eta hiru kideko familia kaleratu egin dute. Emakumea eta bi seme-alabak Etxebideren etxe batean bizi ziren. Etxearen jabea, ordea, partikular bat da.
Kaleratzeen aurkako plataformek eskatua zioten epaileari etxegabetzea atzera zezala, familiarentzako beste aterpe bat bilatu artean. Epaitegiek, baina, prozedurarekin aurrera egitea erabaki dute.
"Partikularren arteko akordio batez ari gara, eta ez dugu horretan esku hartuko. Baina inor etxetik kaleratu aurretik beste aterpe bat izango duela bermatu behar zaio. Izan ere, Europak berak onartu du etxegabetze bat dela etxea izateko eskubidea urratzeko modurik ankerrena", salatu du plataformako kide Arturo Val del Olmok.
