Parisen, Unescoren egoitzaren aurrean, Frantziako Gobernuaren mende diren hizkuntza gutxituetako ordezkariek elkarretaratzea egin dute gaur eguerdian, eta Unescori eskatu diote hizkuntza gutxituak babesteko; "kultur asiloa" galdegin diote, zehazki.
Martxoaren 31 Kolektiboak antolatu du elkarretaratzea. Euskal Herriko, Okzitaniako, Bretainiako, Alsaziako eta Korsikako ordezkariak elkartu dira eskakizunarekin, ehun bat ordezkari, Parisen. 11:00etan egin dute elkarretaratzea.
"Frantziako Estatuak hizkuntzak hiltzen ditu", salatu dute. François Hollande Frantziako presidenteak eman hitza oroitarazi dute, alegia Europako Hizkuntza Gutxituen Ituna berretsiko zuela. Ez du halakorik egin, baina. Gaurko elkarretaratzea "lehen abisua" izan dela erran diote.
Euskal Herritik, Hur Gorostiaga joan da protestara, Euskal Konfederazioaren izenean. Frederique Espagnac senatari sozialista ere han izan da.
