Astebete pasatxo falta da aurtengo Nafarroa Oinez jaialdirako, eta jada antolakuntzaren inguruko atal gehienak oso aurreraturik daude Zangozan. Ibilbideaz gain, lau gune prestatu dituzte antolatzaileek, eta ekitaldi ugari ere bai: umeentzako ikuskizunak, magia emanaldiak, Altxatu, Zarako K, Leihotikan, Esne Beltza, Gose, Glaukoma, Willis Drummond, Balerdi Balerdi eta beste zenbait talderen kontzertuak, dantza emanaldia eta beste zenbait ekitaldi, horien artean Erronka izenekoa, DBHko gazteen parte hartze aktiboa sustatzea helburu duen txapelketa.
Txikiak handi Nafarroako ikastolek aspaldi abiarazitako egitasmoak ere segida izango du Nafarroa Oinez-en. "Hizkuntza gutxituen handitasuna aldarrikatzea eta haien arteko zubiak eraikitzea" du helburu egitasmo horrek, eta aurtengo jaialdian kitxua eta Saharako hassania hizkuntza izango dituzte bereziki gogoan.
Nafarroako Gobernuak "ez-euskalduntzat" jotzen duen aldean dago Zangozako ikastola. 35 urte daramatza lanean euskarazko irakaskuntza sustatzen. Euskarari eta euskal kulturari bultzada emateaz gain, proiektuaren iraunkortasuna eta hezkuntzaren kalitatea bermatzeko diru baliabideak lortzea ezarri dute helburutzat aurtengo jaialdian.
Bideoa: Nafarroa Oinez-en abestia.
[youtube]http://youtu.be/Hetr5RfE4Yw[/youtube]
