Edorta Miranda Hodei Bila elkarteko kidearen arabera, atxilotuak dituztenak auziaren "hari gidatzailea" ziren, kasuak "erraza" zirudien, baina ez dira gai izan "erantzukizunak ezartzeko". Bi dira atxilotuta jarraitzen dutenak; hirugarren lagun bat apirilaren 18an utzi zuten aske.
Ikerketa ireki bat eskatu du Mirandak Efe berri agentziari egindako adierazpenetan, eta horrekin batera, bilaketan baliabide gehiago jartzea galdegin du.
"Ezin dugu onartu pertsona gazte bat, beka batekin herrialdetik atera dena, Europako herrialde batean desager dadila eta Europa ez dadila gai izan hura aurkitzeko". Mirandak uste du horrek "segurtasun eza" eragiten diela beka batekin atzerrira doazen ikasleei, eta baita "beste jende askori" ere.
Gertatutakoa argitzen lagunduko duten lekuko gehiago bilatzeko deia egin du Hodei Bila elkarteak. Urriaren 19an desagertu zen Hodei Egiluz, Anberesen.
