Presoen sakabanaketak haien senitartekoei eragiten dizkien ondorioak "salatu eta gizarteratzeko asmoz", mobilizazioak egin zituen atzo Etxerat euskal preso politikoen senitarteko eta lagunen elkarteak. Giza kateak egin zituzten bost hondartzatan, batez ere turistei haien egoeraren berri emateko. Donostian, Zarautzen, Hendaian, Plentzian eta Laidan egin zituzten kateak.
Iragan ostegunean eginiko agerraldian, Etxerat-ek salatu zuen sakabanaketaren ondorioz senitartekoak "bizitza arriskuan jartzera behartzen" dituztela. Nabarmendu zuten presoen sakabanaketa eta horren ondorioak ez direla senitartekoen erantzukizuna, "ezarri" egiten dieten "behar bat" baizik.
Modu horretan, "gogor kritikatu" zituzten Angel Yuste Espetxe Erakundeetako idazkari nagusiak ekainaren 25ean Espainiako Kongresuan eginiko hitzak. Sakabanaketaren ondorioz gertatzen diren errepide istripuen erantzukizuna presoak bisitatzera joateko erabakia hartzen dutenena dela esan baitzuen bertan Yustek.
Azpeitiko Loiolako Santutegi ondoan elkarretaratzera deitu du elkarteak abuztuaren 1erako.
