EH Bilduk "garrantzi berezia" eman nahi die herritarren iritziari eta eguneroko parte hartzeari; horregatik, parte hartzeko prozesu bat abiatu du, hurrengo urte politikorako plangintza eta programa osatzeko. Horrekin, "politika egiteko bestelako eredu bat" jarri nahi du indarrean: "Herritarrak eta haien beharrak eta interesak dira gure eguneroko jardun politikoaren ardatza", adierazi du koalizioak.
Herritarrek modua izango dute EH Bilduren webgunean iritzia emateko, eskura jarriko duten atal berezi batean. Ekarpenak "modu eraginkorragoan" egiteko, atal berezituak egongo dira iritzia emateko: euskara, hezkuntza, ATHa, finantza sistema... Gainera, aurrez aurreko kritikak eta iritziak entzuteko "prestasun osoa" agertu du.
