"Hodei Ijurkorekin egiten ari direna tortura kronikoa da", salatu du Amnistiaren Aldeko eta Errepresioaren Aurkako Mugimenduak, eta muturreko egoeraren adibideak jarri ditu: "isolamenduko moduluan egotea, ziega barruan eguneko 21 ordu pasatzea eta patiora gehienez beste preso batekin atera ahal izatea, besteak beste".
Egoera honen aurrean, Mikel San Sebastianek eta Ibai Aginagak "borroka gogorrari" ekin diote, gose greba mugagabeari hain zuzen ere. "Euren osasuna arriskutan jartzen ari dira Hodei Ijurkorekin elkartasunean, bere kideekin elkartu dezaten".
Hodei Ijurko 2008ko martxoan atxilotu zuen Polizia foralak, kale borroka ekintza batean parte hartzea leporatuta. Hasiera batean, 38 urteko espetxe zigorra eskatu zuen berarentzat Audientzia Nazionaleko fiskalak eta azkenean, 10 urtetan geratu zen zigorra.
