Denboralearen eraginez, Ebro ibaiak gainezka egin du Erriberako hainbat herritan, Castejonen eta Tuteran kasu, eta aurrealerta egoeran daude Nafarroako beste ibai batzuk; esaterako, Ega ibaia Andosillan. Arga, Arakil eta Larraun ere hazita doaz. Arriskuaz ohartarazi du Iruñeko Udalak, eta Argak gainezka egin ohi duen lekuetan ibilgailuak ez aparkatzeko eskatu die herritarrei.
Uholdeen arriskua dela-eta, Eusko Jaurlaritzak larrialdi plana aktibatu du. Olatu handiak espero dira gaur kostaldean: alerta laranja ezarri dute Bizkaian eta Gipuzkoan. Aemeten arabera, litekeena da sei-zazpi metro arteko olatuak izatea gaur eta bihar. Olatu handi horiek sor ditzaketen arazoak saiheste aldera, Getaria eta Zarautz arteko N-634 errepidea (Gipuzkoa) itxita egon da goizean hiru orduz.
Harrigarria! RT @goimeteo:Gaur goizeko itsasgorako olatuak Donostian! Olas de la pleamar de esta mañana en Donosti! http://t.co/aKgdNLDFKU
— Euskalmet (@Euskalmet) February 24, 2015Denboraldea kostaldean nabarituko da batez ere, baina barrualdean ere nabari da haren eragina. Elurra dela-eta, Etzegarate mendatean adi gidatu behar da. Bigarren mailako errepideetan, kateak behar dira Opakua, Aiurdin, Gatzaga, Barazar eta Urduñako mendateetan.
Gipuzkoa, Araba eta Nafarroa osoan alerta horia dago ezarrita elurragatik eta haize boladengatik. Elurra 500-700 metrotara egin dezake, eta euri asko egingo duela espero da.
