Iberdrolaren Gueñesko azpiestazioari eraso diote, pneumatikoei su emanez

Iberdrolaren azpiestazioari eraso diote bart Gueñesen (Bizkaia); zehazki, erretzen saiatu dira pneumatikoak jarri eta su emanez.

Gauerdian, 00:05 aldera gertatu da erasoa Jaurlaritzako Herrizaingo Sailaren arabera, eta ordu erdi inguruz, argindarrik gabe utzi ditu bost auzunetako bizilagunak.Gainera, azpiestazioan hainbat kalte eragin ditu suak. Nolanahi ere, 00:40etan bizilagunek argindarra bazuten.

Atzo goizaldean Iberdrolaren Lezoko (Gipuzkoa) azpiestazioari erasozioten modu berean, eta baita Errenteriko transformadore bati ere. Ordubete inguruz izan ziren Lezo eta Errenteriako bizilagunak argindarrik gabe.