Iberiako pilotuek gaur jakinaraziko dituzte lanuzteetarako datak

MADRIL. SEPLA Espainiako hegazkin pilotuen sindikatuko presidente Justo Peralek jakinarazi duenez, sindikatuak gaur erregistratuko ditu abendurako deitzekotan diren greba egunetako datak. Pilotuek greba egiteko asmoari eutsi diote, tripulazioko langileek ziurtatu badute ere ez dutela bat egingo pilotuen deiekin. Negoziatzeko abagunea «erabat» agortu arte, tripulazioko beharginen ordezkari sindikalek esan dute ez dutela lan etenetara deitzeko asmorik. Hala ere, pilotuen deiekin bat egiten ez badute ere, ez dute baztertu euren kabuz lanuztera deitzeko aukera.