Iparragirre Alcala Meco espetxetik atera zuten, atzo, 17:00etan. Angelita Burgoa presoaren amak adierazi zuenez, Iparragirre Madril inguruko beste espetxe batera eramatekotan ziren, eta gaur Zaballako espetxera (Araba) lekualdatzea espero zuten, Arrasatera eraman aurretik. Azkenean, bihar eramango dute Arrasateko Aita Menni erietxera. Erietxean egonda ere, preso atxikiko dute Iparragirre, bigarren graduan, Jose Luis de Castro epaileak hala erabakita.
Iparragirreren senideek salatu dute ez dakitela presoa zehazki non dagoen. Iparragirre Arrasatera iristen denean haren deia jasotzea espero dute. Ez dute uste presoa heltzen denean bisitatzen utziko dietenik, eta ziurrenik datorren astera arte itxaron beharko dutela adierazi du Iparragirreren anaiak.
Gaixotasun larria du Iparragirrek, eta hil edo bizi dago, behin eta berriro egindako mediku proba guztiek erakutsi dutenez. Presoa aske uzteko eskatu dute haren abokatuek behin baino gehiagotan, baina Espainiako Auzitegi Nagusiko Espetxe Zaintzako epaile Jose Luis Castrok ez du aintzat hartu eskaera, "horretarako baldintzak" betetzen ez zituela eta "berriro delitua egiteko" arriskua zegoela iritzita.
Ramon aldasoro, aske
Ramon Aldasoro euskal preso otxandiarra aske gelditu da gaur goizean. Murtziako espetxetik irten da, hogei urteko kartzelaldiaren ondoren.
1997an atxilotu zuen FBIk, Miamin (AEB), eta AEBetako Justiziak Espainiaren esku utzi zuen 1998ko ekainean. Harena izan zen AEBek Espainiara ETAko kide bat estraditatu zuten lehen aldia.
Senide eta lagunak izan ditu zain espetxeko atarian.
