Idahoko (AEB) Estatu Gaietarako Batzordeak, Kongresuaren eta Senatuaren bilkura bateratuan, Euskal Herrian irekitako aro politiko berriari buruzko itxaropena adierazi du adierazpen instituzional bidez. “Ipar Ameriketako euskal populazioaren erdigune izanik”, beste hainbat aldiz egin bezala, Idahoko Estatuak hitza hartu nahi izan du oraingo aldi honetan ere. Legebiltzarrak “goraipatu” egin du ETAk iragan urrian iragarri izana “ekintza armatuen behin betiko etena eta terrorismoaren amaiera”, eta horrekin batera, Espainiako, Frantziako, Nafarroako eta EAEko gobernuei dei egin die “euren ekintzen bidez elkarrizketa bultza dezaten euskal lurraldeetan, bake iraunkorra lortzeko”.
“Gobernu demokratikoei” babesa eta laguntza eskaini die bake iraunkor bat lortzeko negoziazio prozesu bat eratzeko esfortzuetan. Baita “terrorismoaren biktima guztien errekonozimendurako” eta “euskal lurraldeen etorkizun konstituzionalaren inguruan bide demokratiko guztiak eta erreferendum baterako aukerak aztertzeko” ere.
Idahoko Estatuaren adierazpen ofizial horren berri emango diete AEBetako Estatu idazkariari, AEBetako Senatu eta Kongresuari, Legebiltzarreko Idahoko ordezkariei, Espainiako gobernuburuari, Frantziako lehendakariari eta Nafarroako eta Eusko Jaurlaritzako lehendakariei.
