PSEko idazkari nagusia eta Araba, Bizkai eta Gipuzkoako idazkari nagusiak aukeratzeko kanpaina abian da. Hautagai izateko beharrezkoak ziren abalak aurkeztu ondoren, irailaren 15era arteko epea izango dute euren asmoen berri emateko. Hilaren 16an egingo dute bozketa.
Arabako idazkaritza nagusirako lehian ariko dira Cristina Gonzalez (abalen %43,78 eskuratu ditu) eta Ivan Ruiz de Eguilaz (bermeen %25,39rekin). Ruiz de Eguilazen arabera, "garrantzitsua" da nondik datozen gogoratzea, etorkizunari "beste modu batera" aurre egiteko.
Bizkaian, berriz, Mikel Torres eta Iñaki Egaña dira hautagaiak. Lehenak 1.080 berme aurkeztu ditu; bigarrenak, 643. Torresek esan duenez, alderdiaren batasuna "bermatuta" dago, eta aukeratua bada, ziurtatu du ez duela alderdiaren barruan "iraultzarik" egingo.
PSE-EEko idazkari nagusi Idoia Mendia izango da, bera baita hautagai bakarra. Berdin gertatzen da Gipuzkoako idazkari nagusi kargurako: Iñaki Arriola bakarrik aurkeztu da.
