Larunbatean iragarritakoari ekin diote iheslariek. EIPK Euskal Iheslari Politikoen Kolektiboko kideek agerraldi bat egin zuten Arrangoitzen larunbatean, iragarriz sorterrira itzultzen hasiko zirela. Hasi dira jada horretan.
Euskal Herriak luzaz pairatutako gatazka politikoak eta haren ondorioek konponbidea behar dutela erran zuten, eta konponbidearen aldeko urratsak egiteko garaia dela azpimarratu: "Euskal Herriaren geroari itxaropenez eta ilusioz begiratu nahi diogu, inoiz inork bere sorterritik ihes egin behar ez dezan". Idoia Espiasek eta Jon Irazolak irakurri zuten adierazpena, lehenik frantsesez eta ondotik euskaraz.
EIPKren helburua, garatu beharreko prozesu demokratikoaren barnean, erbestearekin behin betiko bukatzea dela adierazi zuten mintzaideek. Bakeak eta konponbideak "etsaiak" dituztela erran zuten. Traba horiek guztiak gainditzeko iheslarien kolektiboa bidea egiten ari dela azaldu zuten mintzaideek. Gogoratu zuten joan den ekainean Miarritzeko Irati gelan Herria Dugu Arnas ekitaldian iheslariek plazaratu zuten bide orria.
Iheslariek joan den ekainaren 15ean egindako Herria Dugu Arnas ekitaldian plazaratu zuten haien ekarpena. Ildo horretan egindako urrats bat da larunbatekoa. Izan ere, anitz dira munduan zehar sakabanatuak dauden iheslariak.
