Euskadi-Akitania euroeskualdeak 1,1 milioi euroko aurrekontua izango du, Eusko jaurlaritzak eta Akitaniak erdi bana jarriko dutena. Orain arteko lanei jarraipena emango dietela jakinarazi dute bilkuraren ostean, eta bost proiektu nagusi nabarmenduko dituztela jakinarazi du: arlo sozioekonomikoetako mugaz gaindiko elkarlan proiektuak bultzatuko dituzte, ekainean aurkeztuko duten Akitania-Euskadi 2020 plan estrategikoa, euroeskualdearen ikusgarritasuna sustatzea, eragile sozioekonomikoen arteko elkarlana sustatuko dute eta garraio arloan tren bidezko loturak bilatuko dituzte.
Azken horri dagokionez, bi dira azpimarratu beharrekoak. Batetik, jakinarazi dute ekainetik aurrera hiru tren iritsiko direla egunero Hendaiara EAEtik, eta datorren urtetik aurrera, bertatik Astigarragara beste hiruna tren iristea aurreikusten dute (AHTaren geltokietako bat Astigarragan egitea aurreikusita dago). 2017rako adierazi dute zuzenean posible izango dela Bordelen trena hartu eta Donostiara iristea, inolako aldaketarik egin gabe bidean, hirugarren errail baten bidez.
Hori hurbileko trenari dagokionez. AHTari dagokionez, Europari "engaiamendu handiagoa" eskatuko diote AHT sustatzeko unean, eta Euskal Y-arekiko lotura berma dezala eskatuko dute.
