"Euskaltegiak ez ito". Lelo horrek laburbiltzen du Nafarroako IKAko eta AEK-ko ikasleek eta irakasleek Iruñean egin duten protestaren mezua. Karrikara atera dira, laugarrenez, joan den abendutik, Nafarroako Gobernuak zor dien dirua eskatzeko. 2012ko urritik, euro bakar bat ere ez dute jaso. 2013rako 245.000 euroko saila onartuta zegoen euskaltegientzat, baina gobernuak ez du banatu. 2014rako, berriz, diru laguntzen deialdia ere ez du egin Hezkuntza Departamentuak, oraindik ere.
Hori guztia salatzeko, giza katea egin dute euskaltegietako kideek. Nafarroako Gobernuaren egoitzaren aurretik abiatu dira. Estafetatik ailegatu dira Udaletxeko plazara, eta Santo Domingo aldapatik behera, Hezkuntza Departamentuaren egoitzaren aurrean amaitu dute protesta. Euskara ikasteko eskubidea aldarrikatu dute parte hartzaileek. AEK-ko Helios del Santok eta IKAko Sagrario Alemanek euskaltegien "egoera larria" salatu dute. Diru laguntzarik jaso ez izanak soldatetan eta lan baldintzetan izan du eragina. Gobernuari dagokion zerbitzu publikoa egiten dutela nabarmendu dute.
