Iaz sanferminetan ikurrina jarri izana "lege iruzurra" dela ebatzi du epaile batek, eta horren inguruko balorazioa egin du Ana Ollo Nafarroako Gobernuko bozeramaileak: "Sententzia guztiak bezala, errespetatu besterik ezin dugu egin".
Ikurren Legearen balizko aldaketaz galdetuta, berriz, Ollok esan du gobernua "lekuko gisa" ari dela jarraitzen Nafarroako Parlamentuak ildo horretan egingo dituen lanak: "Ikurren Legea Parlamentuan dago, eta lege proposamen baten bidez tramitatzeaz hitz egiten ari da; hortaz, eztabaidaren erdigunea parlamentuan dago".
Ollok gogorarazi du gobernua babesten duten lau alderdien akordioan jasotzen dela Ikurren Legearen aldaketa, eta gobernuak legealdiko konpromiso gisa duela.
Joseba Asiron Iruñeko alkateak, berriz, jakinarazi du helegitea aurkeztuko duela udalak ebazpenaren aurka. Gainera, eskatu du gaia "lehenbailehen eta koherentziaz" argitzeko.
Beste lege baten beharra
Adolfo Araiz EH Bilduko parlamentariak ere ebazpenaren inguruko irakurketa egin du: “Beste behin ere, legearen indarrez milaka nafarrek berezkotzat duten sinbolo baten debekua inposatzen da". Araizen iritziz, erabakiaren bidez "sinbolo jakin batzuen inposizioa, beste batzuen debekua eta kontrakoa erabakitzen duten udalen gaineko mehatxua indartu egiten da".
