Lau urteko obrak, 215 milioi euroko gastua, eta zabalik da gaurtik San Mameseko sarbide berria Bilbon. Urteetan agindutakoa bete dute gaur erakundeek, eta itxi dute Sabino Aranako sarbidea. Kontua da, ordea, itxitako bideak baino ibilgailu gutxiago hartzeko gaitasuna daukala bide berriak, eta jadanik sortu dira lehen auto ilarak, nahiz larunbata izan. Bihurgune gehiago ditu bide berriak, eta abiadura motelagoan doaz autoak; gainera, semaforoak daudenez kaleetan, inbutu gisakoa sortzen da sarbidean. Astelehen goizean espero dituzte arazo handienak, jendea lanerako bidean dela.
Juan Garaiko sarbideetako bat irekitzea erabaki dute erakundeek egoera horren aurrean. Hamar urtean itxita eduki dute bide hori, eta hango bizilagunak kexu dira orain. Errekaldeko auzotarrek ere protesta egin dute Sabino Aranako sarbidearen parean; gogorarazi dute auzo horretatik igarotzen den autobide zatia ere botako zutela agindu zietela.
