Bilboko konpartsek antolatuta, elkarretaratzea egingo dute bihar, Arriagan, 18:00etan. Eraso sexistarik ez! leloarekin egingo dute protesta.
Gaur goizaldean eraso sexista bat gertatu zela jakinarazi dute konpartsek. Emakume bat lurrera bota eta jo egin du gizon batek, konpartsek jakitera eman dutenez.
Han inguruan ziren pertsonek artean gelditu dute gizonezkoa, atxilotu duten arte.
Jaiak segurua eta erasoetatik askea izan behar duela aldarrikatu dute konpartsek, bat eginda: "Edozein motako matxismo, sexismo, homofobia, lesbofobia eta arrazakeria jokaerak ez dira onartuko jai gunean".
Emakumeek jaiez eta espazio publikoaz gozatzeko eskubidea dutela ere nabarmendu dute, "inork gogaitu barik".
Larunbat arratsaldean, berriz, Ertzaintzak 24 urteko gizon bat atxilotu zuen. Bilboko Casilda parkean emakume bati sexu ukituak egitea leporatu diote.
