INDEPENDENTISTAK. LEHEN KONFERENTZIA. Sarea ehunduz joateko abiapuntua ezarri dute

Joan zen otsailaren 27an egin zuten jendaurreko lehen agerraldia, Ari gara agiria aurkeztu zutenean. Atzo, Independentistak sarearen Lehen Konferentzia egin zuten, Donostiako Psikologia Fakultateko pleno areto betean. Independentistak sarea Euskal Herriaren independentzia helburu duten eta xede horretan lan egin nahi duten guztiei zabaldutako egitasmo irekia da.

Topa ere egin zuten batzarraren amaieran, fakultateko ataurrean, osatu duten sareak «balio erantsia» duelako.

«Lehen aldia da Euskal Herrian sentsibilitate eta sigla desberdinen gainetik independentista guztiok biltzen gaituen sare bat osatzen dugula, eta sare hau benetan apustu estrategikoen inguruan osatu da, oraindik hasi eta etorkizunean independentziaren aldeko auzolan erraldoi bat garatzeko», izan ziren Txutxi Ariznabarretak, sarea sortzen jardun duen taldeko kideak, batzarreko kide guztiei esandako hitzak, edalontzia esku artean, eztarria busti aurretik. Ospakizuna bihurtu zuten ekitaldia, «asko dugulako ospatzeko. Sare independentistaren eraketa modua eta ezaugarriak adostu ditugu. Jauzi kualitatibo itzela da. Sarea eratuz, hedatuz eta sendotuz joateko oinarriak ezarri ditugu».

Izan ere, topa-egite ekitaldiaren aurretik, hiru orduko batzarrean jardun zuten sarearen helburu eta nortasun ikurrak, antolaketa eredua eta plan estrategikoa zehazten. Eztabaidarako aurkeztutako dokumentua oinarri gisa hartuta, berau ezarri zuten abiapuntu, gerora gehiago garatu eta sakontzeko.

Batzarraren eta eztabaida fasearen ezaugarrien artean, «ilusioa, gogoa eta baikortasuna» nabarmendu dituzte sarekideek. Ariznabarretaren hitzetan, «eztabaida prozesua eta gaurko [atzoko] batzarra oso aberatsak izan dira. Oso parte-hartze handia izan da prozesu guztian, baita batzarrean ere. Jasotako ekarpen guztiekin oinarrizko material hau osatuko dugu, handitu eta aberastu. Prozesu hori oso dinamikoa izango da; independentisten sarean jende gehiago sartu ahala, sentsibilitate berriak, kontu berriak, ekarpen berriak egongo dira; orain denon artean adostu duguna handituz, zabalduz, eta aberastuz joango gara».

Aktibismoa eta lan ideologikoa

Independentisten sarea hedatu, sendotu eta garatzea, hori dute jomuga. Sarea sendotu, aktibismoa eta lan ideologikoaren arteko uztarketarako. «Pentsatzen, eztabaidatzen, hitz egiten duen eta, batez ere, egiten duen jende multzoa izanen da gure sarea», dio onartutako testuak.

«Jarduera irizpide nagusiak konfrontazio demokratikoa, desobedientzia zibila eta nazio eraikuntza izanen dira. Erabakitzeko ahalmena ukatzen dituzten Frantziako eta Espainiako nazionalismoekiko nahiz euren estatuekiko konfrontazio demokratikoa, baketsua, zabala eta zuzena garatuko dugu».

Aniztuna, sentsibilitate guztiek osatua, maila guztietako ehuntzea, eta hierarkiarik gabeko antolakuntza izango ditu ezaugarri sareak. Hainbat ardura eta konpromiso izango dituzten pertsonen sarea aurreikusi dutenez, sareko kide izateko maila desberdinak ere ezarri dituzte.

Deszentralizatutako egitura edukita ere, koordinazioa ere behar denez, Independentisten Talde Bultzatzailea ere osatu dute. Atzo arteko ibilbidean, hamasei bat lagun aritu badira batzarra bitarteko lanetan, aurrerantzean berrogeita sei kidek osatuko dute Talde Bultzatzailea. Batetik, hierarkietatik ihes egiteko, eta, bestetik, sentsibilitate guztiak ordezkatuta egoteko eta lurralde eta genero aldetik orekari eusteko. Eta ez da talde itxia izango. Sarea hedatu ahala, Talde Bultzatzailea bera ere haziz joango dela aurreratu dute sarekideek.

Independentziaren eztabaida indartzeko asmoz, hurrengo bi urteotarako bi mugarri dituzte ezarrita; 2011ko Aberri eguna, eta 2012a, Nafarroaren konkistaren bosgarren mendeurrena «gure herriaren independentziaren aldeko erreferentzia bilakatzeko asmoz».

Sarearen helburu eta nortasun ikurrak

«Independentistak gara, independentzia XXI. mendeko apustu bideragarria izateaz gain, Euskal Herriarendako aukerarik onena baita [...]. Independentzia ez da munduko beste herriekiko haustura, elkartasun bide berriak bultzatzea baizik».

«Independentistak sarea mugimendu demokrata aurrerakoia da, Euskal Errepublika eraikitzeko bitarteko demokratiko baketsuak erabiliko dituena [...]».

«Irizpide nagusiak konfrontazio demokratikoa, desobedientzia zibila eta nazio eraikuntza izanen dira[...]».

«Ohiko antolakuntza ereduak gaindituz, mugimendu berri bat sortzen ari gara; norbanakoez osaturiko esparrua, independentea, alderdien joko eta hauteskunde lehietatik at egonen dena [...]».

«Independentista guztien arteko auzolana bultzatzea da gure zeregin nagusia. Gure herriaren aniztasun adierazpen guztiak aintzat hartuta erritmo, ezberdintasun eta berezitasun guztiak aitortzen eta bideratzen dituen estrategia nazional integratzailea garatuko dugu Euskal Herri osoan eta Euskal Herri osorako [...]».

Independentisten Talde Bultzatzailea

Mapi Alonso

Therese Alzouet

Battita Ameztoi

David Anaut

Floren Aoiz

Ana Arbulu

Maite Aristegi

Txutxi Ariznabarreta

Raul Arkaia

Cesar Arrondo

Joseba Azkarraga

Patxi Azparren

Oscar Bañuelos

Garbiñe Bueno

Maider Carrere

Koldo Castañeda

Mertxe Colina

Jon Andoni del Amo

Jakoba Errekondo

Ixabel Etxeberria

Juan Mari Feliu

Itziar Fernandez

Nekane Garmendia

Patxi Gaztelumendi

Joseba Gezuraga

Juan Karlos Goienetxea

Ana Irastorza

Itziar Ituño

Estitxu Iturrate

Enara Izagirre

Antton Izagirre

Ramon Labaien

Txolo Landaluze

Maria Luisa Mangado

Alex Marañon

Estibalitz Mujika

Paul Nicholson

Zelai Nikolas

Iñaki Olano

Iñaki Ortiz de Villalba

Fredi Paia

Iñigo Santxo

Xabier Sarasua

Jorge Segoviano

Xebe Txoperena

Gloria Zuazola

5.000

2012rako. Independentziaren aldeko jarduera garatzeko, bi urte barrurako 5.000 sarekide (sarean izena emanda, kuota ordaintzeko eta jardueretan parte hartzeko konpromisoa hartzen dutenak) eta 500 sare-dinamizatzaile biltzeko helburua jarri dute.

Parte hartzeko moduak

Ahalaren arabera, maila desberdineko kideak izango ditu sareak. Independentistak: sareaz bat egiten duten guztiak. Sarekideak: kuota ordaindu eta oinarrizko konpromisoa hartzen dutenak. Dinamizatzaileak: sarean ardura zehatzak dituztenak. Aktibistak: desobedientzia zibila eta «bestelako aktibismo baketsu eta ausartak» garatuko dituztenak.

100.000 euro hurrengoAberri Egunerako

Independentistak sarearen proiektuak eta egitasmoak finantzatzeko datorren Aberri Egunerako 100.000 euro biltzeko kanpaina abiatuko dute, ekarpen erraldoietatik, mikro-donazioetara zabalduta. «Ehun mila independentista bagara, ezta? Beraz, bakoitzak euro bat jarriz gero, 100.000 euro guztira!», diote.