Espainiako Kongresuko legegintzaldi berriaren hasiera baino lehen egin dute erregearen eta monarkiaren aurkako adierazpena Espainiako Estatuko alderdi independentista eta errepublikazaleetako kideek, azaltzeko zergatik ez diren joanen lehendabiziko saiora. Nabarmendu dute ez diotela zilegitasunik ematen erregeari, eta gogor mintzatu dira monarkiaren aurka: «Kataluniako, Galiziako eta Euskal Herriko gizartearen gehiengoak gaitzetsi egiten du erabat anakronikoa eta frankismoaren oinordekoa den instituzioa». EH Bilduren izenean, Oskar Matutek irakurri du Ez dugu erregerik. Demokrazia, askatasuna, errepublikak. adierazpena, euskaraz; katalanez, galizieraz eta gazteleraz ere irakurri dute ERCko Gabriel Rufianek, JxCeko Laura Borrasek, CUPeko Mireia Vehik eta BNGko Nestor Regok.
Monarkiak haien herrien nahiak zapaltzen dituela salatu dute. «Espainiako batasuna eta legedia inposatzea ditu monarkiak oinarri, gure herrien eta herritarren eskubide zibil, politiko eta nazionalak ukatuz». Horren adibide jarri dute, erraterako, urriaren 3an erregeak egindako «diskurtso autoritarioa». Gaitzetsi dutenez, erregearen figura ez dator bat «askatasuna, berdintasuna eta demokrazia bezalako balio errepublikanoekin», eta erregeak ordezkatzen dituen balioekin «apurtuz soilik izango da posible benetako demokrazia». Monarkiak haien herrien gain duen boterea ezabatzea galdegin dute: «Espainiako erregeak eta monarkiak gure parlamentuen, herritarren eta gobernuen aurkako tutoretza alde batera utzi behar dute, horrela bakarrik lortuko direlako herri borondatearen errespetuan, askatasunean eta demokrazian oinarritutako konponbideak».
