Pozik agertu ziren ekimenen antolatzaileak jendearen erantzunarekin eta emaitzarekin.Bildu zen jendearen artean zapi berdeak banatu zituzten,eta eguerdi aldera berdez jantzirik zeuden azoka inguruak.
Hamabietan zen lehenengo ekitaldia, eta Independentzia lelopean, hamarnaka lagun bildu ziren Landakon, pankarta berdearen atzean, kontzentrazioa egin eta argazki jendetsua ateratzeko asmoz. Leloaz gain, Independentistak sarearen zortzi puntako izarra ere ikus zitekeen pankartan. Halako beste hainbat «argazki berde» atera ditu jada sareak uda osoan. Txutxi Ariznabarreta sarearen sortzaile eta bultzatzaileetako batek azaldu duenez, gizarteko eremu ezberdinetan dagoen independentzia nahia azaleratzea da helburua.
Jende askoren parte-hartzea behar da lip duba grabatzeko. Goizeko hamaiketatik ilara zegoen jada azokaren ate nagusian, parte-hartzaileek izena eman zezaten. Bertan, adinaren eta profilaren arabera, ibilbidean zehar non jarri behar ziren esaten ziotenjendeari, 13:00etarako bakoitzak bere postuan egon behar zuela gogoraraziz. Umoretsu heldu ziren adin guztietako parte-hartzaileak, eta asko ez zihoazen esku hutsik; ikurrinak, mozorroak eta abar ikusten ziren.
13:00etan denak beren postuetan zeuden. Jendea aldarte onez, baina antolatzaileak urduri. Entsegu bakar bat eta mozketa barik, lau minutuz, eta bozgorailu eta kamara baten laguntzarekin, ehunka pertsona dantzan jartzea ez da lan erreza eta. Baina emaitza txukuna izan zen. Etxe artean zanpantzarren laguntzarekin hasi eta erreka gainetik igaro ostean, Landako inguruan bueltaka ibili ziren kamera eta bozgorailua. Momentu batean azoka sarreran ere ibili ziren. Bidean denetarik zegoen; zahar eta gazte; erraldoiak eta panpinak; baita tximiniara ikurrina bat eskuan igo zen eskalatzaile bat ere. Denak, musika entzuten hasi orduko, dantzan. Amaieran, jende dena multzo handi batean bildu zen, azken leloa elkarrekin dantzatzeko. Ikurrinak, presoen eta euskal selekzioaren aldeko ikurrak, independentzia hitza osatzen zuten letrak... denetarik zuen jendeak, bideoari kolorea eman nahian.
Antolatzaileek azaldu dutenez, lehen aldia da nazio mailan halako grabaketa bat egiten dela. Lip dub «jendetsu, alai, aldarrikatzaile, parte-hartzaile eta librea» izan da. Independentziaren aldeko kantu egoki bat bilatzea zaila egin zitzaiela eta aukeratu zuten Sarri, Sarri kantua: erreza, dantzatzeko egokia eta ezaguna. «Sinbolismoz beteriko kanta» delako aukeratu zuten antolatzaileek, «askatasunaren aldarri» delako. Gainera, Joseba Sarrionandia idazle iurretarrari egiten dio erreferentzia. «Sare bidez egin genuen deialdia, eta begi bistan da jendeak ondo erantzun duela».Bideoa muntatzeko garaia da orain.
