Ingelesez irakasteko programetako ikasleak bikoiztu egin dira bi urtean

Nafarroako Gobernuak eman du datua: 103.809 ikasle ari dira aurten, herrialde horretan, unibertsitatetik kanpoko zikloetan—0 eta 3 urte artekoa kontuan hartu gabe; horretan 5.832 gehiago daude—. Iazko datuekin alderatuta, %2 egin du gora matrikulazioak. Gorakadarik nabarmenena, ingelesez irakasteko programetan —lehen TIL eredua deitzen zena, hizkuntzaren tratamendu integratua— sumatu da: 2010eko datuekin alderatuta, ia bikoiztu egin da programa horietan ari diren ikasleen kopurua: 3.999 ziren duela bi urte; eta, aurten, berriz, 7.976.

Halako programak eskaintzen dituzten ikastetxeen kopuruak ere gora egin du Nafarroan: 28 ziren 2011n, eta aurten 40 dira. Ingelesez irakasteko programetan parte hartzen duten ia 8.000 ikasle horietatik 4.646k gaztelaniaz eta ingelesez egiten dituzte ikasketak; bertze 2.260k, gainera, euskara ikasgaitzat dute; eta 458 ikaslek, azkenik, euskaraz eta ingelesez hartzen dituzte eskolak.

Gehienak, sare publikoan

Aurten unibertsitatetik kanpoko zikloetan ari diren 103.809 ikasleetatik gehienek, 67.000 baino gehiagok (%64,82), sare publikoan ikasten dute; pribatuan, berriz, 36.516 ari dira (%35,17).

Ereduei dagokienez, G eredua da nagusi, ikasleen %56,42 ari baita horretan. Gaztelania hutseko eredua da hori. D eredua, euskarazkoa, bigarrena da, ikasleen %25,91rekin. A ereduan —gaztelaniaz, euskara irakasgai gisa dutela— %17,46 ari dira; eta %0,22, B ereduan.

Iazko matrikulazioarekin alderatuta, datuak plazaratzeko modua aldatu du Nafarroako Gobernuak aurten. Beraz, ezinezkoa da iazko datuekin alderatzea, eredu bakoitzean ari den ikasle kopurua ez baitu eman Nafarroako Gobernuak oraingoz.