Iñigo Lamarca: «Abusu polizialen alorrean, ez dugu eraginkortasunik»

1998an EAEko Arartekoak etorkinen aurkako polizia gehiegikeriei buruz egindako txosteneko gomendioak erabateko gaurkotasuna dute egun. «Hamahiru urteotan ez da ia aurrerapausorik eman», aitortu zuen atzo Iñigo Lamarcak SOS Arrazakeriak antolatutako topaketan. Besteak beste, salaketak ez ikertzea eta gehiegikeriak saihesteko protokolo bakarra —inkomunikazio aldietarakoa— ez betetzea deitoratu zuen. «Ezintasunez» mintzatu zen arartekoa: «29 lan esparru dauzkagu, eta 28tan eraginkortasun handia dugu: auzien %80an gure gomendioak kontuan hartzen dituzte administrazioek. Baina abusu polizialen alorrean, gure eraginkortasuna hutsa da».