Inkesta baten arabera, herritarren %71k argi zuten nori eman botoa

Prospekzio Soziologikoen Kabineteak, bozak amaitu ostean, ikerketa bat egin du, eta telefonoz mila herritarri galdeketa egin die kanpainaren eta hauteskunde emaitzen inguruan. Ondorioetako bat izan da kanpainaren hasieratik herritarren %71k argi zutela nori eman botoa. Hala, inkestaren arabera, zalantzatien poltsa %15 ingurukoa izan da, beste %14k abstenitzea edo zuri bozkatzea argi zutelako.

Zalantzatien artean hauek ziren duda nagusiak: %19k EAJ eta Amaiurren artean zalantza zuten; %14k PP eta PSEren artean; %12k PSE eta IU-Ezker Anitzaren artean; %8k PP eta UPDren artean; %5k EAJ eta PPren artean; %4k PSE eta Amaiurren artean, eta portzentaje berean, IU eta Amaiurren artean.

Botorik eman ez dutenen gehienek, berriz, nolabaiteko mesfidantza edo ezadostasuna islatu nahi izan dute: %37k alderdi edo politikariekiko mesfidantza dute; %28 «politikaz eta hauteskundeez nazkatuta» daude; %20k uste dute botoa emateak ez duela ezertarako balio, eta beste %20k ez dute gustuko aukerarik; %13k, berriz, ezadostasuna islatu nahi dute.

Elkarrizketatuen ia erdientzat (%47) botoa emateko faktore nagusia alderdia da, %29rentzat programa politikoa, eta %8rentzat hautagaia. Herritarren %54k ontzat jo dituzte emaitzak.