Iparra Galdu Baik plataformak martxa egingo du bihar Basauriko kartzelara

Bizkaiko kostaldekoa da Ibon Iparragirre; ondarroarra. Haren herrian Iparragirre aska dezatela lortzeko helburuz sortutako Iparra Galdu Baik plataformak ekimena antolatu du biharko. Martxa egingo du herkidea preso duten Basauriko espetxera. 11:30ean elkarretaratzea egingo du kartzela aurrean, eta bertaratzeko deia zabaldu du plataformak.

Babesak ere jaso ditu deialdiak. Egin Dezagun Bidea ekimenak protestarekin bat egin, eta Basaurira joateko eskatu die herritarrei: «Beste gaixotasun batzuen artean hiesa du, eta bere osasun egoera oso-oso larria da», ohartarazi du. «Espetxetik lehenbailehen atera behar du, minutuak pasatu ahala bere egoerak okerrera egiten baitu». Ezker abertzaleak ere bat egin du deialdiarekin.