Udalak iragarkia jarri dutenak zigortzeko txosten bat abiatu du, eta 200 eta 450 euro bitartekoa izan daiteke isuna. EH Bilduk salatu duenez, iragarkiak "estereotipo eta klixe heteropatriarkalak" oinarri dituen "rol sexistak" erreproduzitzen ditu.
Durangoko Udalak ez dio erreferentziarik egin iragarkiaren izaera sexistari, baina argudiatu du ezin dela iragarkirik jarri "udalak baimendutakoak ez diren lekuetan". Halaber, euskararen araudiaren 39. artikulua ere urratzen duela azaldu du; artikulu horren arabera, udalarenak diren azpiegiturak erabiltzen dituztenek —Landakon da azoka— elebitan jarri behar dituzte iragarkiak.
