Hiru orduz aztertu du Parisen zigorren aplikazioen inguruko epaitegiak Jakes Esnalen abokatuek presoa behin-behinean askatzeko eginiko bigarren eskaera. Izan ere, auzitegiak onartu egin zuen presoa askatzea martxoaren 13an. Baina fiskaltzak helegitea jarri zuen. Azkenean, erabakia irailaren 24an ematea ebatzi du auzitegiak. Bitartean, espetxean jarraituko du Esnalek.
Esnalen abokatuek saioan egoteko aukera eduki dute, lehen aldiz, eta, nabarmendu dutenez, fiskaltzak oso gogor jo du presoa askatzeko erabakiaren kontra, eta erabakia horrenbeste atzeratzearekin kezkatuta daudela adierazi dute.
Izan ere, Esnalek 70 urte ditu, eta 30 urte baino gehiago eduki dute preso dagoeneko. Denborak haren kontra jokatzen du; gainera, askatzea erabakitzeko erabakiaren eragina duten arrazoietako bat presoak lanpostu bat edukitzea da, eta adin horrekin oso zaila da.
Donibane Lohizunekoa da Esnal (Lapurdi), eta 1990eko apirilean atxilotu zuten, ETAko kide izatea egotzita, Ion Kepa Parot eta Xistor Aranbururekin, Espainiako Poliziak Unai Parot atxilotu ondoren. Bizi guztiko kartzela zigorra ezarri zioten, baina 18 urteren buruan berriz aztertzekoa. Behin-behinean askatzeko lehen eskaera 2014. urtean aurkeztu zuten haren abokatuek, eta, bi urte geroago, baztertzea erabaki zuen auzitegiak.
Presoa askatzeko mobilizaziora deitu dute Bakegileek, larunbaterako, haren jaioterrian. Giza kate bat egingo dute Zibururaino (Lapurdi).
