Datorren astera atzeratu dute irakasleen arloko mahai sektorialaren bilera. Hezkuntza Sailak ohar bidez jakinarazi du sindikatuek eskatu dutela atzerapena. Bilera horretan beste proposamen batzuk egitekoa zen jaurlaritza, akordioa lortzeko bidean.
Azken hilabetean negoziazioak azkartu dira gobernuko ordezkarien eta sindikatuen artean. LABek, Steilasek, ELAk, CCOOk eta UGTk ordezkaritza dute mahaian. Aurreko astean sindikatu gehienek keinu on gisa ikusi dute gobernuaren proposamena. Areago, akordiorako oinarria egin dezaketela ere aurreratu zuten.
Aurreko asteko bileran Hezkuntza Sailak ordezkapenak lehen egunetik egitea proposatu zuen, Lehen Hezkuntzan eta DBHn. Duela hiru aste honako proposamenak egin zituen: premia bereziak dituzten ikasgeletan baliabideak handitzea; 3 urteko geletan hogei ume baino gehiago daudenean errefortzuak jartzea; eta 60 urtetik gorako irakasle finkoei eskola orduak jaistea. Gerora zehaztu zuen laguntza horiek emateko irizpideak.
