Irazusta: "Instituzioen eta kalearen artean zubia egin behar du ezker abertzaleak"

Richard Irazusta, Abertzaleen Batasuneko kidea Radio Euskaldin izan da gaur. Batasunaren proposamenari buruz galdetuta, ezker abertzaleak pauso gehiego eman behar dituela azaldu du, eta ezker abertzale "berri" bat osatu behar dela. Azken urteetan gauzak pasatu direla iritzi dio, baina gertatua kontutan hartuta, aurrera begiratu behar dela azpimarratu du.

Bere ustez, ezker abertzaleak aldatu egin behar ditu gauzak lortzeko "formak", "itunak" eginez, eta "gehiengoetan" sartuaz. Gakoa, "herriaren eta instituzioen artean zubi lana" egitean dagoela aldarrikatu du.

Ibarretxeren planari erreferentzia eginez, "hegoaldean egoera pixka bat normalizatzen duen eta eztabaida bere lekuan jartzen duen proposamen batek" Iparraldeari on egingo liokeela uste du Irazustak. Hala ere, Iparraldean EAEko botereak gutxi ezagutzen direla azpimarratu du.

"Herri batean gauzak ez badira mugitzen, mugiarazi egin behar" direla dio, "bestela, jendeak muturreko jarrerak hartzen dituelako. Horregaitik, ereferendumak egin beharko dira, hauteskunde batzuk boikoteatu beharko dira... desobedientzia bideak hartu beharko dira. Nik uste dut demoen adibidea oso ona dela, indarkeria erabilli gabe gauzak lortzeko".

Europako Konstituzio Itunari dagokionean, ABkoak "eztabaida interesgarri bat" egitera doazela iragarri du. "Gure iritziak ez du asko aldatuko kontua, horregaitik eztabaida egiten ari gara, lasai asko, eta eztabaida polita aterako da. Nik uste dut, ezezkoa aterako dela, ezker ikuspegi batean ez delako sartzen Itun hori".