Jendetza bildu da arratsaldean Bilboko Arriaga plazan, Marijaiaren iritsiera ikusi eta Bilboko jaiei hasiera emateko. Nati Ovelleirok Kataluniako herria aipatuz hasi du pregoia.
Errefuxiatu eta etorkinei harrera egiteko mezua zabaldu du pregoian: "Berdin da jatorria eta azala, besoak zabalik Marijaia bezala", esan du; elkartasunaren aldeko hitzak ere esan ditu: "Biba elkartasuna! Behera hesiak!".
Bukaeran, publikoarekin batera kantatu du. Aurretik, paperak banatu dituzte publikoaren artean, denek batera honako bertso hau kantatzeko: "Senegal, Siria, Ekuador/ Nigeria, El Salvador/ Bilbon denontzat dago tokia/ ez da ilegala inor!".
Gaurtik datorren igandera bitartean, ekitaldi ugari izango dira Bilbon: konpartsek 529 jarduera prestatu dituzte, eta udalak, berriz, 400 ekitalditik gora. Kataluniako atentatua dela eta, segurtasun neurriak zorroztu dituzte Bilbon: polizia gehiago ibiliko direla esan du Ertzaintzak.
Sekulako giroa Areatzan. @HdAbante-ren txosna inguruan jendea pozarren dantzan eta eztarria freskatzen @berria#AsteNagusia2017pic.twitter.com/hpi1SmfU2o
— Hordago Abante! (@HdAbante) 2017(e)ko abuztuak 19
