Iraide Ongai eta Daniel Perez EH Bilduko zinegotziak dira inputatuak, Patxi Alzueta eta Garazi Labianorekin batera. Espainiako Gobernuak Nafarroan duen ordezkaritzak jakinarazi duenez, Guardia Zibilak txosten bat igorri du Auzitegi Nazionalera, jakinaraziz Irunberrin presoen aldeko manifestu bat irakurri zutela jaietan, horien alde topa egin eta pankarta bat zabaltzearekin batera.
Auzipetuek agerraldi bat egin dute, deliturik egin izana ukatzeko. Beren ideiak "errespetuz eta elkarbizitzaz, lau haizeetara adierazteko askatasun osoa" dutela nabarmendu dute: "Argi dugu errespetuz jardun eta norbere nortasunarekin kontsekuente izatea Irunberriko herritar guztien izaera dela".
