Istiluekin amaitu da Vox alderdiak gaur Donostian antolatu duen ekitaldia. Eskuin muturreko alderdiko dozena pare bat kide —Javier Ortega Smith buruzagia tartean— elkartu dira Alderdi Ederren, indarkeriaren biktimen oroigarriaren inguruan. 100-200 antifaxista batu dira haien inguruan, eta, tartean, Ertzaintzako beste horrenbeste kide, Voxeko kideak babesten.
Ultraeskuinaren ekitaldia Donostiako Alderdi Ederren; ertzain eta protestari gehiago dago ekitaldian elkartutakoak baino pic.twitter.com/LeKSJKJTSQ
— Jon O. Urain (@olano_urkia) June 21, 2020
«Faxistak kanpora» eta «alde hemendik, utzi bakean» oihukatu diete antifaxistek. Ertzaintzak haien kontra jo du ekitaldiaren amaieran, Voxeko kideei bidea zabaltzeko.
Kontxako pasealekua beteta, eta Ortega Smithen paseo probokatzailea, Poliziak babestuta @berriapic.twitter.com/IxV8HKsTF5
— Jon O. Urain (@olano_urkia) June 21, 2020
Donostiako erdialdetik oinez joan dira eskuin muturreko taldeko kideak, autobusa hartzera Madrilera itzultzeko, eta haien atzetik joan dira antifaxistak oihuka. Une batean, Bilboko plazaren inguruko taberna batean sartu dira. Ertzainek, orduan, kalea itxi dute, Voxeko kideak babesteko.
Bilbon, aurretik
Donostiakoa ez da Voxek Euskal Herrian azken egunotan egin duen ekitaldi bakarra. Ostiralean Bilboko San Frantzisko auzoan egon ziren, eta Sare Antifaxistak protesta ekitaldi bat antolatu zuen. Ertzaintzaren eta Bilboko Udaltzaingoaren talde handi bat zabaldu zen, faxisten ekitaldia babesteko. Haien kontra protesta egitera elkartu ziren 200 pertsona ingururi debekatu egin zieten plazara sartzea, eta istiluak gertatu ziren Ertzaintza antifaxistei oldartu zitzaienean. Ertzainek 22 urteko gazte bat atxilotu zuten.
