Italiako Val di Susako herritarrei elkartasuna azalduko diete etzi Iruñean

Heldu den ostiralean, arratsaldeko zazpietan, elkarretaratze bat egingo du AHT Gelditu! Elkarlanak Italiako kontsuletxearen aurrean, abiadura handiko trenaren aurkako borrokan ari diren Alpeetako Val di Susa ibarreko herritarrei elkartasuna adierazteko. Susako ibarrean, Italiako ipar-mendebaldean, erresistentzia handia egon da AHTaren kontra 1990eko hamarkadaz geroztik. Han, Lyon eta Turin arteko AHTa egin nahi dute Frantziako eta Italiako gobernuek. Azken asteotan berriz ere azkartu dituzte lanak, eta horrek erantzun handia eragin du herritarren aldetik. Ondorioz, polizia eta militar ugari eraman dituzte inguru hartara. «Handik datozkigun berriek esaten digute okupazio polizialaren eta errepresioaren ondorioz zauritutako eta atxilotutako hainbat lagun badirela», ohartarazi du AHT Gelditu! Elkarlanak.