23 urteko itsaspekari bilbotar baten gorpua aurkitu dute Islaresko kostan (Kantabria, Espainia). Goizean topatu dute, hamaikak aurretxoan. Poliziak gorpua berreskuratu, eta portura eraman du; bertan, Polizia Judizialaren esku utzi dute.
112 larrialdi zenbakiak astearte gauean jaso zuen desagerpenaren berri, 22:00 aldera, dei baten bidez. Harrezkero, lurretik, itsasotik eta airetik ari ziren haren bila.
Gazte bilbotarra 19:30ean sartu zen uretara, beste gizon batekin, kirol arrantza egiteko asmoz. 22:00 aldera, kidea uretatik atera zen; banandu egin omen ziren.
Desagerpenaren abisua eman ondoren, bilaketari ekin zioten, 02:30 arte. Asteazken goizean berriro ekin diote bilaketari, eta gorpua Cotonera muturraren ekialdean aurkitu dute.
