«Duela hemeretzi urte ez zen jakin negoziazio bat aurrera eraman eta guztiontzako onargarria izango litzatekeen irtenbidea adosten», nabarmendu du IHS Itziar Herria Sortzen plataformak. Geroztik asko ikasi dutela adierazi dute, «jarrera onarekin» eta «elkarlanerako gogoz» aurkeztu dutela proposamena, Debarentzat eta Itziarrentzat, bientzat onuragarria delakoan.
Auzo-udalak badira Araban, Bizkaian eta Nafarroan. Gipuzkoan Ereñotzun eta Igeldon egin dituzte ahaleginak, baina oraindik ez dira gauzatu. Itziarkoa litzateke herrialdeko lehendabizikoa, sortzekotan. Proposamenaren arabera, Itziarko auzo-udalean sartuko lirateke Itxaspe, Elorria, Arriola, Egia, Mardari, Arbizkoa, Endoia, Lastur eta Kaskoa. Debako egitura administratiboaren barruan jarraituko luke Itziarrek, baina eskumen batzuk lortuko lituzke. Itziartarrek «legeak eskaintzen dituen eskumen guztiak» eskatu dituzte. Autogobernua «benetakoa» eta «osoa» izatea eskatu dute; aldaketa pixkanaka egitea proposatu dute, hala ere. Aurrekontuei dagokienez, debarrek adina jasotzea eskatu dute: «Ez dugu inolako pribilegiorik eskatzen». IHS plataformak eskua luzatu dio Debako Udalari: «Itziarrentzako aurrerapauso hauek Debari kalte egin gabe egin daitezke, auzo-udala elkarlanean, koordinazioan eta adostasunean oinarritzen delako».
Ekimenaren sostengatzaileak
Andoni Egaña (bertsolaria)Joseba Zulaika (antropologoa)
Marino Lejarreta(txirrindulari ohia)
Aitor Osa (txirrindulari ohia)
Olatz Arrizabalaga (arraunlaria)
Izaro Etxaniz (arraunlaria)
Kandido Uranga (aktorea)
Gorka Aginagalde (aktorea)
Joxe Landa (meteorologoa)
Ibon Aranberri (artista)
Mikel Arrizabalaga (euskaltzalea)
Aitor Bilbao (enpresaria)
Bilabiar anaiak (trikitilariak)
M. Tere Odriozola (gai-jartzailea)
Juan Jose Manzisidor (apaiza)
Itziar Beristain (irakaslea)
Joan Mari Aizpurua (organista)
Alberto Gorritiberea(zinema zuzendaria)
