Hiru hilabeteren bueltan auzo udal izateko esperantza du Itziarrek; era horretan, Debako auzoak autonomia izango du hainbat gai kudeatzeko. Iragan hamarkadetan desanexioaren aldeko ahaleginak ere egin dituzte Itziarren, baina iragan urrian Debako Udalbatzarrak auzo udala eratzeko prozesuari onespena eman zionetik, bide hori ari da gailentzen. Ez da Gipuzkoan era horretako hautua egiten duen lehen auzoa; Hernaniko Ereñotzuk hori bera egin zuen 2010. urtean.
«Guretzat eredu da Ereñotzuk jarraitu duen bidea», azaldu dute gaur eguerdian Denon Herria plataformako ordezkariek. «Guztiek guztien partetik jarri dute prozesu hori aurrera eraman ahal izateko». Plataforma berria da Denon Herria, prozesuari arnasa emateko sortutakoa, eta gaur eguerdian aurkeztu dute, Deban.
