11 egun daramatzate baraualdian Saul Curto, Ugaitz Errazkin, Xabier Goienetxe, Oier Ibarguren eta Enrique Lopez euskal presoek Fresnesko espetxean (Frantzia). Zigor ziegan dira Fresnesko emakumezko presoak ere, Iratxe Sorzabal eta Ekhiñe Eizagirre, eta Osnyko presondegian preso daudenek ere protestak hasi dituzte Itziar Morenoren egoera salatzeko.
Gaur, elkarretaratzea egin du Sortuk Frantziak Bilbon duen kontsulatuaren aurrean, presoei elkartasuna adierazi, bakartzea eta sakabanaketa politika "ankerrak" salatu eta kontsulari Morenoren egoeraz ohartarazteko.
Alderdiak salatu du espetxe politika "kriminala" erabiltzen dutela Frantziak eta Espainiak "Euskal Herrian irekitako bake prozesua zapuztu eta euskal presoei etengabeko salbuespen neurriak ezartzeko". Sorturen iritziz, "garaia da halako zigor neurriak behin betiko amaitzeko. Inoiz baino beharrezkoago da indarrak batzea".
