Izan garelako, izango gara leloa jarri dio EAJk aurtengo Alderdi Egunari —35.a izango da—. Gasteizen izango da ospakizuna, Forondako zelaietan, domeka honetan, gaur Belen Greaves EAJko EBBko idazkariak esan duenez. “On Joxe Miguel Barandiaranen baimenarekin, berak esandako berbetan oinarritu gara goiburua egiteko —Izan ginelako, garelako eta izango garelako—”.
EAJk gaur egun "hiru erronka" dauzkala azaldu du Greavesek. Aurrena, krisi ekonomikoa. "Espainiako Estatuaren kasuan behintzat, ez dugu oraindik ikusteko dagoen guztia ikusi. 800.000 milioi euroko zorra eta langabezia konpontzen oso zailak dira. Eta arazo horrek oraindik ezin izan du PP eta PSOE estatuko alderdi nagusi bien arteko akordiorik eragin”.
Bigarren erronka: "bakea eta bizikidetzaren normalizazioa". "Alderdiak oso argi dauka honetan ez dela kalkulu politikorako tokirik. Bakea bakea da eta ez dago bakearekin jolasterik”.
Hirugarren erronka, “nazio gisa duguna da. Euskadi munduan kokatzea. Euskadi Europako beste nazio gisa. Euskadirentzako estatus politiko berria”.
