Hogei biribilez osatutako kartel bat hautatu dute aurten Hondarribiko jaiak iragartzeko; hemeretzi gorriak dira, eta bat beltza. Pentsatzekoa da irudi horrekin erreferentzia egin nahi izan zaiela alardean kantinerarekin ateratzen diren konpainiei, denek txapel gorria eramaten baitute, eta batek beltza. Arazoa da, ordea, txapel bat falta dela; izan ere, Jaizkibel konpainia parekidea —desfilean andreak gizonen pare onartzen dituen bakarra— aintzat hartuta, 21 dira alardean kantinerarekin desfilatzen duten taldeak. Hogei urte da konpainia hori sortu zela, baina aparte desfilatu behar izaten du, besteek ez dutelako onartzen emakumeek bertan duten presentzia parekidea.
Kartela aukeratu dute Hondarribiko Udalak antolatutako lehiaketa baten barruan. Jose Angel Ligero da egilea, Errioxako sortzaile bat. Adierazi du asmo txarrik gabe jardun zuela. "Nik uste nuen hogei konpainia besterik ez zela ateratzen; lehengo urtean, udaleko zinegotzi batek halaxe adierazi zidan", adierazi dio gaur goizean BERRIAri. Udalarekin harremana du, lehengo urtean ere berak irabazi zuelako kartel lehiaketa. Hala ere, esan du ez zuela alardean emakumeen parte hartzearen inguruan dagoen polemikaren berririk. "Ez nuke inoiz ere ezer egingo inor baztertzeko". Udalarekin harremanetan jartzeko ahalegina ere egin du BERRIAk, baina hango komunikazio arduradunek adierazi dute gaur ezin dela inor ere mintzatu gaiaren inguruan.
Jaizkibel konpainiako kideek gaur arratsaldean aztertuko dute gaia, bilera batean.
