Eusko Jaurlaritzak eta Nafarroako Gobernuak gaur sinatuko dute EITBren seinalea Nafarroan hedatzeko hitzarmena. Jaurlaritzak eta Nafarroako Gobernuak bidalitako ohar batean eman dute erabakiaren berri. Akordioak kontuan hartuko ditu telebista —LTD eta kable bidezkoa— eta irratiak —emisio digitala eta FM bidezkoa—. Bi gobernuek hilaren hasieran onartu dute ituna. Horren bidez, Nafarroako Parlamentuak eta hainbat udalek eginiko eskaerari erantzutea dute helburu.
Ituna sinatu arren, azken hitza Espainiako Gobernuarena da; hark du telebista emisioen eskumena. Bi gobernuek akordioa lortzea pauso garrantzitsua da, Madrilek kontuan hartzen baititu halakoak, "salbuespen gisa".
Nafarroako Gobernuaren arabera, hitzarmen horretan jasoko dute EITBren konpromisoa Nafarroako "errealitate politiko, sozial eta instituzionala, eta sinboloak eta identitatea" errespetatzeko. Euskal Autonomia Erkidegotik bereizitako errealitate gisa aurkeztuko dutela ere jasoko dute itunean: "Bertako lurralde historikoetako errealitatetik bereizita aurkeztuko eta ordezkatuko dute EITBko profesionalek idatzitako informazioetan eta haien aurkezpenetan". Sentsibilitate politiko eta ideologiko guztiak kontuan izan eta errespetatuko dituzte, "iritzi publiko plurala osatzeko".
Apiriletik, itzalita
Espainiako Industria Ministeroak aginduta eten behar izan zuten ETBren emisioa Nafarroan, apirilean. UPNren gobernuak aurkeztutako salaketa baten harira eman zuen agindua: salaketa 2015eko martxoan jarri zuen, gobernu aldaketa gertatu aurretik. Yolanda Barcinaren gobernuak ez zion salaketaren berri eman Uxue Barkosen gobernu berriari, eta, agindua iritsi zenean, salaketa kendu eta emisioa eteteko erabakia bertan behera uzteko eskatu zuen.
