Eusko Jaurlaritzak ez du murrizketa gehiagorik egiteko asmorik, eta zerbitzu publikoen, osasunaren, hezkuntzaren eta inbertsioaren aldeko apustua egingo du, gaur Manu Salinero Lehendakaritzako idazkari nagusiak esan duenez. Halaber, adierazi du gastuen eta diru sarreren arteko oreka ez badute lortzen, zorpetzera joko dutela, murrizketak baztertuta.
"Euskadi eredua sustatzen ari gara, krisiari aurre egiteko beste modu bat", esan du Salinerok. "Ez dugu eurorik murriztuko zientzian, teknologian eta berrikuntzan. Alderantziz, diru gehiago jarriko dugu, lehentasuna emanda".
Patxi Lopez Jaurlaritzako lehendakariak duela aste batzuk iragarri zuen ez dituela Espainiako Gobernuaren hezkuntza eta osasun arloetako murrizketak ezarriko, eta Auzitegi Konstituzionalean helegitea sartuko duela.
Lehendakaritzako idazkari nagusiaren arabera, murrizketen politikak ez dira onak izan ekonomiarentzat. "Horrek ekarri gaitu honaino eta ez gaitu hemendik aterako. Beraz, ezinbestekoa izango da zorpetzea".
