Araba, Bizkai eta Gipuzkoako 70.000 langile publiko inguruk gaurtik aurrera jasoko dute 2015ari dagozkion aparteko lansarietako bat. 2014ko gabonei zegokiena udara aurreratuta, datorren udakoa gaurrera eta aurtengo gabonetakoa udara aurreratuko ditu Jaurlaritzak, Administrazio Publiko eta Justizia Sailak jakinarazi duenez.
Hirugarren urtez erabaki du Jaurlaritzak ordainketak aurreratzea, iritzita "oraindik goizegi" dela Espainiako Gobernuak 2012ko gabonetako saria kendu aurreko egoerara itzultzeko. Halaber, argudiatu du ez ordaintzeak kontsumoan izango lukeen eragina saihestea dela aurreratzearen asmoa.
Horren harira, Jaurlaritzak jakinarazi du apirilean ordainduko duela lansari haren %25. 2015erako Eusko Legebiltzarrak onartutako aurrekontuek aintzat hartu zuten gastu hori —50 milioi eurokoa—. Bide batez Andres Zearreta Funtzio Publikoko sailburuordeak gogoratu du Espainiako Konstituzio auzitegiak erabakitzeke dituela auzi honekin lotutako lau helegite, eta horiek lehenbailehen argitzeko eskatu dio.
