Jaurlaritzak uste du Mariano Rajoyren gobernuak egindako aurrekontuak "inbaditu" egiten dituela EAEko eskumenak, eta, horregatik, Konstituzionalean salatzea erabaki du.
Gaur goizean gobernu kontseiluan izan dute gaia hizpide. Josu Erkoreka Jaurlaritzako bozeramaileak eman du erabakiaren berri —harekin izan da Ricardo Gatzagaetxebarria Ogasun sailburua—. Salaketa aurkezteko arrazoiak "soilik eskumenei lotutakoak" direla nabarmendu du Erkorekak. Zehazki, Erkorekak esan du funtzio publikoaren, erakundeen antolaketaren, lan arloko legediaren eta gizarte zerbitzuen eskumenei lotutakoak direla "urratu" direnak.
2012ko eta 2013ko kontuen gaineko salaketak aldi berean aurkeztuko dituztela jakinarazi du Jaurlaritzako bozeramaileak. Kontuen aurka helegitea aurkezteko epea martxoaren amaieran bukatzen da.
