Arratsaldean ekitaldi bat egin du EAJk Baionako trinketean, eta bertan izan dira, besteak beste, Andoni Ortuzar EAJko Euzkadi Buru Batzarreko presidentea eta Txaro Goikolea Ipar Buru Batzarreko presidentea.
Ortuzarrek esan duenez, "Euskadik, Bidasoaren bi aldeetara zabaltzen den Euskal Herri honek, ordezkaritza indartsu bat behar du Europako Parlamentuan. Europan euskal herritarren jarrerak entzunaraziko dituen ahotsa, gure interesak defendatuko dituena. Eta baita bestelako Europa baten alde lan egingo duena ere".
Nabarmendu du EAJ dela Ipar nahiz Hego Euskal Herrian "alderdi gisa" aurkezten den eta "herri ikuskera osoa" duen bakarra.
