Igande goizean atera zen Gorostiaga Herrerako espetxetik, eta iluntzean harrera egin zioten Laudioko plazan ehundik gora lagunek.
Gorostiagak 73 urte ditu, eta Laudioko alkate izan da hiru aldiz. 18/98 makrosumarioagatik izan zen espetxeratua, 2007an, Egin auzian.
2013an, Laudioko jaietako pregoilari izendatu zuen jai batzordeak Gorostiaga, baina Carlos Urkijo Espainiako Gobernuko ordezkariak eskatuta, hura pregoilari izatea debekatu zuen epaileak. Urte hartako irailean hil zen Gorostiagaren bikotekide Judith Uriarte, gaixotasun baten ondorioz; Gorostiaga ez zuten garaiz Euskal Herriratu, eta ez zuen bikotekidea agurtzeko aukerarik izan.
