Epailea ez da familiarekin bildu erabakia hartzeko, eta idazki baten bidez jakinarazi dio helegitea baztertu duela. Tolosako prozedurak iraun duen hiru urteetan behin hartu zuen epaileak Anza familia, duela urtebete, Parisko justiziari jakinarazi ondoren kasua ixtera zihoala.
Anza 2009ko apirilaren 18an desagertu zen, Tolosarako trena hartu zuelarik. 2010eko martxoaren 11n jakin zen haren gorpua Tolosako Purpan erietxean zegoela gorderik 2009ko apirilaren 30ean karrikan atzeman ondoren. Jon Anzaren desagertzea eta heriotzaren arrazoiak ikertzeko eskatu zuen familiak.
Baionako prokuradore Anne Kayanakisek egia osoa eginen zela eta disfuntzionamenduak ikertuko zirela erran zuen. Tolosako ikerketak ez du norabide hori hartu. Helarazitako galdera gehienak baztertuak izan direla salatu zuen familiak, eta galdeketak onartu dituelarik, epaileak ez dio familiari baimenik eman bertan egon eta nahi zituen galderak pausatzeko.
"Frantses justiziak ez du argirik egin nahi Jonen kasuan eta uko egiten dio afera horrek eskatzen duen gardentasun tratua emateari" erran dute Anzaren abokatuek. Bide batez jakinarazi dute familiak prozedurak eskaintzen dizkion bide guztiak baliatuko dituela, Anza aferan izan diren "disfuntzionamendu guztiak" argitu eta horien arduradunak zigortzea lortzeko, izan daitezen ardura judizialak edo poliziarenak.
